11/18/2021 - 16:25

الأردن و"إسرائيل" والإمارات يتجهون لتوقيع اتفاقية جديدة يوم الاثنين المقبل في دبي لبناء محطة ضخمة للطاقة الشمسية في الصحراء الأردنية لتوليد الكهرباء لـ"إسرائيل" بتمويل إماراتي، مقابل بناء محطة تحلية مياه للأردن في "إسرائيل" على ساحل البحر الأبيض المتوسط

نبدأ مع مروان حميدات: بنشتري غاز من الكيان المحتل عشان نولد كهربا للاردن. وبنولد كهرباء في الأردن بالطاقة الشمسية عشان نزود الكيان المحتل بالكهربا وبرجع الكيان بحلي مياه البحر بواسطة الكهربا وبرجعلنا مي عذبه.. مش فاهم اشي ليش كل هالحفلة

ياخي ولد طاقة شمسية بالصحرا وابعث جزء منها حلي مياه من خليج العقبة وضخها بالطاقة الي عندك لباقي المملكة وبلاش ترهن مياهك وطاقتك لكيان غاشم.

وليد الطريقي قال : الآن عرفنا مقدمات الحكومة بالنسبة لدعاية خط الديسي وفش مي وسدود فاضية عشان يحطو الشعب تحت الأمر الواقع الغير واقعي

وكتب آدم: عفكرة الإتفاقية راح تنقذ الأردن من شح المياه.

وعلق عمر: كيف بتسلم شريان الحياة لبلدك لعدوك، الا اذا انت مش معتبره عدو اصلا فهيك اشي ثاني، لانوا تضحيات الجيش العربي على اسوار القدس لسا بدرسوها بمناهج الاجتماعيات بصف الخامس على ما اتذكر

بينما قال أبو حسين: هذه هو دور الإمارات احتلال اقتصادي للاردن لصالح الكيان الصهيوني

رجاء علقت: ليش نعتمد على إسرائيل لانشاء محطة تحلية مياه على المتوسط و تزويدنا بالماء و احنا عنا بحر في العقبة و يمكن انشاء محطة اردنية لتحلية المياه و تحقق الاكتفاء الذاتي

كانت هذه مجموعة من تعليقات رواد مواقع التواصل الاجتماعي مع توقيع إتفاقية جديدة بين الأردن وإسرائيل والإمارات