03/15/2022 - 15:16

جدل كبير على مواقع التواصل الاجتماعي إثر إعلان الحكومة في وقت متأخر من الليل قرار تعطيل المدارس لسوء الأحوال الجوية ..

فكتبت رند ابو شوك: طيب أنا أم ما بعرف انو عطلتو الولاد كنتو بتقدرو تطلعو القرار مبارح عالستة المسا مثلاً مش والعالم نايمة أما ابعت ولادي اليوم بالبرد على اساس دوام ويرجعولي يحكولي طلع عطلة!!

وعلق سفيان جهاد: رجعت الحكومة تتخبط بقراراتها قبل ما تعلن عطلة للمدارس حطو صوبات ولا تدفئة فيهم

المدارس الحكومية مشكلة كبيرة بالبرد فش اي وسائل راحة للطالب

وتفاعلت لارا العايدي:والله اخر دلع لهالطلاببس احنا بعجبناش العجب لا اذا عطلونا ولا اذا داومونا راح نلومكم عالجهتين

انا بشوف انو قرار سليم بس لو اعلنتو عنو بدري

روان الزبيدي قالت:اخر اهتمامات الدولة هو المدارس او مش من اولوياتها اصلا

حتى التعليم كلو بطل مهم عندها

انا مع انك تعطل المدارس بهيك يوم بس بنفس الوقت وفر بيئة آمنة للطلاب وفرلهم دفايات!!

وفي موضوع اخر تفاعل رواد مواقع التواصل الاجتماعي مع تصريحات نقيب تجار المواد الغذائية خليل الحاج توفيق أن وجود الارتفاعات على أسعار العديد من المواد الغذائية في السوق المحلية، غير مرتبط بتبعات الأزمة الروسية الأوكرانية وإنما لارتفاع الأسعار عالميا..

أنس المعايطة قال: اه صح لانه احنا بنصدر وبلد مستقل من جميع النواحي وما عنا فساد فما بنتاثر بأي اشي خارجي

الا شوية هالتحديات الخارجيه الله يبعدنا عنها

أما إبراهيم فعلق: التجار سحبوا الزيت من الأسواق لأنه ما اعجبهم أسعار الحكومه... واحنا كمحلات صرنا تحت رحمة المستورد والتاجر الرئيسي... ليش ما يكون في منصه حكوميه تبيع المواد بسعر الجملة

ونختمها مع زيد ابو عيد: جشع تجار مسيطر ..

الحرب باوكرانيا مش بالشرق الأوسط وبعدين الحرب ملهاش كم يوم لحقنا نحط رفع الاسعار بظهر الحرب!

استغلال للناس وارتفاع اسعار جنوني

كانت هذه مجموعة من تعليقات رواد مواقع التواصل الاجتماعي مع قرار تعطيل المدارس وارتفاع الاسعار.